Deux poèmes en kreol réunionnais de Jean-Louis ROBERT.

 

LANPARÈR KOKO

Dann kèr in gran pyé koko,

Lavé koko (kosa zot té krwa lavé, mang ?)

An konfizyon é bon pou kasé.

Anba, lavé domoun an tralé

La boush té fé dlo.

Zot noré byin vouli manz koko,

Bwar dolo, fé bonbon koko,

(Nana té i krwa kosa, bonbon manyok ?)

Soman lavé pwin inn pou oz mont dési

Lo pyé d bwa, la tèt i dor dann nyaz,

Zot té di. Té falé byin zot té i koz !

Ziskatank la trouv in boug

Pou fé lo travay. La pa bézwin di azot,

Mi di kanminm, kan li la riv anlèr,

Anba, pou anpar la min

Pou trap lo bann fri, lavé domoun

An konfizyon an poundyak an tralé.

Kasèr koko lé malizé trouvé

Mé lanparèr, sa i anmank pa ditou,

I trouv azot partou.

In ma d'kadèr

ki koné son kadriy

pou fé lo kador

la zwé kadok

sanm dé-trwa ti kadine

mé li la gingn mal kadik

Zan-Lui ROBER.