Bondie kone kouma mo kontan mo pei
Vremem li enn ti paradi.
Zordi pou gagn gato Divali
Gato la ena ankor pli gou
Parski mo kone in kwi sa avek lamour
Enn fwa dan enn lane,sakenn so tour
Tou Morisyin fer la bous dou
Yer ti gato Marie
Avantier gato Lalinn
Larmoni anvelope dan papie mouslinn
Lape isi ena parfin briani !
Ena bann Rawan ki rod met dife
Pou kokin Sita nou konfians
Me mem si nou pa enn pep parfe
Gard toultan alime diya nou lintelizans
Depi toultan mo swiv tradision
Sorti depi Lasinn, Lenn, Lerop, Lafrik
Akoz sa toultan dan mwa mo ena nosion
Ki sa lil la ena so kote mistik
Mersi pou tou bann ki gardyin nou valer
Sirtou valer partaze
Samem ki fer nou boner
Dan tou fet, samem ki bizin propaze !
Sedley Richard ASSONNE, alias Le Vicomte des gueux.
Aucun commentaire:
Enregistrer un commentaire