(Lo 16/10, Daniel Honoré noré fèt son 84 an. Ma la ékri kozman la kan li lé parti lo 18/10/2018. Lé parti mé lé touzour la sanm nou gras son travay pou la lang kréol.)
KOZMAN POU DANYÈL
an fonn-shagrin dépi gran matin
épi ma la komans ékri
dann mon langkozé mon langékri
alors in gayar mazinasyon
la travèrs mon fonnkèr
la klèrsi mon santiman
dann shak mo mwin té ékri
shak mo mwin té pronons
mwin té san out prézans
out prézans té for dann mon kozékri
lé for dann mon ékrikoz
ma la konpri
kanminm out kor té pi la
lo san out lèspri té koul touzour
va koul touzour
dann kor la lang kréol réyoné
i sifi fé viv ali pou fé viv aou
fé viv ali pou vréman
san anfèrm ali
dann milyé in lantouraz rakèt
markot ali pou fénésans
lo mo i mank anou ankor
konmsa ou sra ansanm nou
touzour ansanm nou
mi sèr dann mon fonnkèr
gayar mazinasyon la
pou fé fane mon dépitasyon
Jean-Louis ROBERT.
In La lang ankor /Encore la lang, éditions K'A.
Aucun commentaire:
Enregistrer un commentaire