lundi 9 avril 2018

Un poème en kreol (Réunion) de Jean-Louis ROBERT, KOZMAN ANSANM VOLKAN.





koman i lé Volkan ?
ou fé boukan aswar !
noré di in gran gabar !
mé ou lé gayar !
ou larkinpèt an flèr-d-flam !



out lang lav
i kour i vol si lo kor la tèr
i rod lèv la mèr
lèv lamour
i rod love la mèr



la mèr san pasyans
koman in valal boukar
i pèt an flèr



aster ou flèr lèv la mèr



lo syèl la tèr i soukant
lo rougay la lang
lang la lav lang la lam



out lang i plonz dann la mèr
out bous laba i bourant 
lo syèl la tèr


lo syèl i fèt an plèr
vezou rougay blé rouz
lil la gingn in bout la tèr an plis



astèr i fo mi rantr
anbras lo vantr
gout la lèv mon zézère
astèr i fo mi bar mon boukan
sinonsa mon zézère
va rantr dann mon volkan
alé nartrouv ! ziska mi koné pi kan











Jean-Louis ROBERT.
















All rights reserved.














Aucun commentaire:

Enregistrer un commentaire